page contents
USA Real Estate Blog

英超人工性價比:曼聯水魚無誤,利鏝使得精明,阿車對得住球迷 – Ivan Li 李聲揚

0 1


英超人工性價比:曼聯水魚無誤,利鏝使得精明,阿車對得住球迷

記得之前寫過篇德國波文,畀人狂插,狂恥笑上維基睇波。開頭有啲扯火,但諗諗下都係,年紀大記性差體力衰退,講睇波點都多唔過啲新一代(而嗰篇文又真係比較差)。既然係咁,索性個踢法再經濟啲,幾廿歲同你鬥撞咩,直頭唔同你講場波。我就做星期一早上四分衞(Monday morning quarterback),完晒球季先寫文。波都唔使睇。呢排先最多文出

跟進返隔離台陳生(其實相識多年,一齊睇楝篤笑一齊食糖水添)轉貼,英超性價比,球員平均人工 vs 拎到幾多分。計下平均用幾錢先拎到一分。結論係卡迪夫城最均真最抵玩(但,降班,有乜用?),曼聯最水魚亂洗錢(但,都有歐霸)。以下呢個表簡稱 原文或原表

正如都有人講,計平均有啲過度簡化,另外有啲友可能拎好高人工但唔使上場,或者隊中人工分野好大真係計就計晒咁多場,全季上陣時間,weighted average。其實唔難,而家網站有總上陣時間,球員人工又大約公開,但冇咁得閒,你鍾意嘅慢慢計。再唔係計中位數人工又得。叔叔姑且用住呢個先,我覺得都OK。記住啦,鳩up最簡單,最撚好廿蚊有靜岡蜜瓜你食。但我地落手落腳寫文或做研究嘅,永遠係簡單/準確/快手之間拎個平衡。

應該冇入錯data掛

用返原文同樣嘅數據,食午飯時(本人好撚勤力的)整咗呢個東西。X軸(打橫)平均人工,英鎊。Y軸(打楝)聯賽分數。打斜條線就trend line

如圖見到,首先,條trend line係幾fit 的,都幾多點點在條線附近(學術地講,個R square 近0.7,人工解釋咗七成分數)。證明都真係大約有條路捉,一分鐘一分貨,好波就人工高,邊有咁多underpaid。我鳩估,如果十幾廿年前,會見到條線冇咁fit,好多歐拉牙。即係好多水魚,但又同時有人好精明 (唔係玩嘢,你諗真啲:如果人人水魚,反而條線都係fit,水唔水魚係一個相對量度)。歡迎你自己試玩下十幾年前嘅英超。

第二,條trend line,延長佢,都唔會經過0,0 嗰點。理論上你睇圖,「一個仙糧都唔出都拎到廿分」,實際當然唔係。但重點,係「線性關係」,而並唔係「正比例」(不幸地,我發現好多人讀完大學,甚至理科學位都唔知咩係「正比例」。香港啲STEM又一笑撚死人,都係睇英超算)。正比例係線性關係嘅一種特例,y=mx (而冇+c,斷估你都唔記得呢啲嘢)。線性關係……即係個圖好似樓上咁有條直線fit 到入去咪係。條直線會插過0,0嘅咪會係正比例。明冇?

唔咁學究呢,好簡單,就係你見到人工升三倍,分數唔會升三倍。例如般尼,在條線上,40分,百六萬人工阿仙奴車路士亦在條線上,近五百萬人工,般尼三倍,但80分都唔夠,更唔好話120分

第三.所以,原文用平均用幾錢先拎到一分,當然易明,但唔棈準。我呢個圖就精準,貼多次,十分簡單,平均嘅就係在條線度。在條線上高(北面)嘅就即係精明,性價比高,在條線下底(南面)就水魚。

你發現,結論同原文有少少唔同。以下係結論:

一.曼聯係大水魚無誤(鳩估,好大舊去晒山神同普巴度?),原文同我圖都見到,十分明顯

二.榜尾嘅,哈德斯菲爾特(係咁譯?)亦係水魚無誤,不用討論。但其實富咸同修咸頓都極水魚。原文佢地就未係最尾幾隊

三.精打細算嚟講,原文會講卡迪夫城最勁。但我圖見到,只係剛剛好同平均差不多。原文第二嘅狼隊,就實至名歸。原文第三嘅屈福特,在我圖亦不錯

四.前列份子方面,熱刺係outperformer。原文佢只係放中間

五.車路士阿仙奴,原文都相當水(尾四尾三),但我圖見到,其實根本係中規中矩,對得住球迷

六.最重要係,原文中游嘅曼城利物浦,在我圖中,係相當精明嘅。特別係利物浦

七.最後,煩都要講多次。都係金錢世界。條線好明顯,都仲係越高人工越高分迫悉匙就係人工最高嘅六隊(亦係收入最高嘅六隊),而且拋離其他隊唔少(曼聯除外)。卡迪夫同哈特斯菲爾特,兩隊降班,亦係人工開支最低。反而富咸呢,嗰個人工水平其實同好多隊差不多,例如同狼隊都差不多,但表現爭好遠。真係教波嘅,搵呢啲隊教,就表現到自己能力

八.最最最後,好怕啲友嚟同我拗,「都係各有觀點,大家唔同計法」。呀大佬,咁事實就係plot 個圖出嚟,條線就係唔經0,0嘛。咁點會正比例,點會係應該計「平均用幾錢先拎到一分」。你話為普通波牛讀者易明就冇所謂,但我地呢度啲讀者(自命)中產知識份子架嘛!同英國啲薯條佬一般見識咩?況且,根據我主觀嘅理解,似乎我圖得出嚟嘅結論(利物浦曼城熱刺洗得叻,阿仙奴車路士中規中矩),係比較貼近一般球迷睇波嘅觀感。而唔係原文嘅結論(阿仙奴車路士性價比低,利物浦中游)

(學術撚先好入:條線其實會係 y=10.6x + 22。y係分數,x係百萬鎊人工。即係每多一百萬鎊人工就買11分左右,底分22分—但事實上呢個底分解唔通,所以我費事貼上圖度,唔想誤導啲普通讀者)

قالب وردپرس

You might also like

Leave A Reply

Your email address will not be published.

Pin It on Pinterest

Share This

Share this post with your friends!